كرىستىيانو رونالدو ئىتالىيە بىرلەشمىسىنىڭ 60 يىللىق رېكورتىنى بۇزۇپ تاشلىدى

2020/2021-يىللىق مۇسابىقە پەسلى ئىتالىيە A دەرىجىلىكلەر بىرلەشمىسىنىڭ 13-ئايلانمىسىدىكى تاردىنى توپ مەيدانىدا ئۆتكۈزۈلگەن بىر مەيدان مۇسابىقىدە، پارما كوماندىسى ساھىبخان مەيداندا يۇۋېنتۇس بىلەن مۇسابىقىگە چۈشتى، ئاخىرىدا يۇۋېنتۇس 0:4 نەتىجىدە پارمانى مەغلۇپ قىلدى، بۇ مەيدان مۇسابىقىدە رونالدو ئىككى توپ كىرگۈزدى.

ئىسپانىيە تاراتقۇسى «ئاس گېزىتى»نىڭ خەۋىرىگە ئاساسلانغاندا، يۇۋېنتۇس ھۇجۇمچىسى رونالدو بۇنىڭ بىلەن 2020-يىلى ئىتالىيە بىرلەشمىسىدە 33 توپ كىرگۈزۈپ بولغان بولۇپ، ئىتالىيە بىرلەشمىسىنىڭ 60 يىلغا سوزۇلغان رېكورتىنى بۇزۇپ تاشلىغان.رونالدو 1961-يىلىدىكى يۇۋېنتۇس ھۇجۇمچىسى سىۋورىدىن كېيىن تەبىئىي بىر يىل ئىچىدىكى ئىتالىيە بىرلەشمىسىدە كىرگۈزگەن توپ سانى 33 توپقا يەتكەن تۇنجى توپچىغا ئايلانغان، رونالدو بۇ مۇسابىقە پەسلىدىكى توققۇز ئايلانما ئىتالىيە بىرلەشمىسىدە 12 توپ كىرگۈزگەن.

ئىتالىيە بىرلەشمىسى تارىخىدا تەبىئىي بىر يىل ئىچىدىكى بىرلەشمە مۇسابىقىلىرىدە كىرگۈزگەن توپ سانى رونالدودىن كۆپ بولغان پەقەت ئىككى نەپەر توپچىلا بار بولۇپ، ئۇلار بولسا 1933-يىلى ئىتالىيە بىرلەشمىسىدە 41 توپ كىرگۈزگەن يۇۋېنتۇس ھۇجۇمچىسى بورېل بىلەن 1950-يىلى ئىتالىيە بىرلەشمىسىدە 36 توپ كىرگۈزگەن AC مىلان ھۇجۇمچىسى نودال ئىكەن.

بۇ يىلغا تەۋە ئىتالىيە بىرلەشمىسىنىڭ يەنە بىر ئايلانما مۇسابىقىسى قالغان بولۇپ، رونالدونىڭ داۋاملىق ئۆزىنىڭ توپ كىرگۈزۈش رېكورتىنى يېڭىلاش پۇرسىتى بار ئىكەن، ئۇنىڭدىن باشقا رونالدو 2020-يىلى يۇۋېنتۇسقا ۋاكالىتەن ھەر تۈرلۈك مۇسابىقىلەردە 38 مەيدان مۇسابىقىگە قاتنىشىپ، 41 توپ كىرگۈزگەن.