تىيانشان تورى خەۋىرى (ئىختىيارىي مۇخبىرلىرىمىز مېڭكېزۇلۇ، ما يۆ فوتوسى، خەۋىرى): يېقىندا، شىنجاڭ بايىنغولىن موڭغۇل ئاپتونوم ئوبلاستى يەنجى خۇيزۇ ئاپتونوم ناھىيەسى ئۇخاۋچۈ يېزىسى چاغانچۈ كەنتىنىڭ كەنت ئاھالىسى جاۋ دۇڭمېينىڭ كۆكتات پارنىكىدىكى قىپقىزىل شوخلىلار كىشىلەرنىڭ ئالاھىدە دىققىتىنى تارتتى، ئۇ ئائىلىسىدىكىلەر بىلەن بىللە شوخلا ئۈزۈۋاتاتتى، بۇ شوخلىلارنىڭ يېرىمى ئىچكىرى رايونلارغا توشۇلىدۇ، يېرىمى ئەتراپتىكى بازارلارغا كىرىدۇ.
جاۋ دۇڭمېينىڭ ئائىلىسىدە بەش جان بولۇپ، ئالتە مو يەرنى تېرىيدۇ، ئىلگىرى ئەنئەنىۋى دېھقانچىلىق زىرائەتلىرىنى تېرىغاچقا، كىرىمى يۇقىرى ئەمەس ئىدى. پارتىيەنىڭ خەلقنى بېيىتىش سىياسەتلىرىنىڭ يېتەكچىلىكىدە، كەنت «ئىككى كومىتېت»ىنىڭ يېتەكلىشى ۋە ئىلھاملاندۇرۇشى بىلەن، تېخىمۇ كۆپ كەنت ئاھالىسى كۆكتات تېرىشنىڭ پايدىسىنى كۆردى. جاۋ دۇڭمېينىڭ ئائىلىسى ئۈچ پارنىك ياسىدى، پارنىك پۈتكەندىن كېيىن، كەنت يەنە يۆگەش ماشىنىسى ۋە يوتقان تارقىتىپ بېرىپ، ئۇنىڭ پارنىكتا مايسا يېتىشتۈرۈشنى تەرەققىي قىلدۇرۇشىغا ئىلھام بەردى. بازار تەكشۈرۈش ئارقىلىق، ئۇ پارنىكتا كۆكتات تېرىغاندا مايسا يېتىشتۈرگەندىن بەكرەك مۇقىم كىرىم قىلغىلى بولىدىغانلىقىنى بايقاپ، كۆكتات تېرىدى. بۇنىڭ پايدىسىنى كۆرگەندىن كېيىن، يىغقان پۇلىغا تۆت مو يەرنى ھۆددىگە ئېلىپ، يەنە ئىككى پارنىك ياسىدى، يەنە ھويلىدىكى بوش يەرگە بىر پارنىك ياسىدى. پارنىك سانى ۋە كۆلىمىنىڭ ئېشىشىغا، ئۇنىڭ ئۈستىگە تېرىقچىلىق تېخنىكىسىنىڭ كۈنسېرى پىشىپ يېتىلىشىگە ئەگىشىپ، ئۇنىڭ ئائىلىسىنىڭ كىرىمى يىلدىن-يىلغا ئاشتى. بۇ يىل، ئۇنىڭ ئائىلىسى تېرىغان شوخلا، لاڭخا، يۇبەسەي، دابەسەيدىن مول ھوسۇل ئالدى، كىرىمىنىڭ 130 مىڭ يۈەندىن 150 مىڭ يۈەنگىچە بولۇشى مۆلچەرلەندى. جاۋ دۇڭمېي مۇنداق دېدى:«ھۆكۈمەتنىڭ دېھقانلارنىڭ پارنىك تېرىقچىلىقىغا يار-يۆلەك بولۇش سىياسىتى ياخشى، دېھقانلارنىڭ ئاكتىپلىقىمۇ ناھايىتى يۇقىرى، ئائىلىمىزنىڭ بۇ يىللىق كىرىمى ئىلگىرىكى يىللاردىكىدىن ياخشى، تۇرمۇشىمىزمۇ بارغانسېرى ياخشىلاندى.»
چاغانچۈ كەنتى يەنجى ناھىيەسىنىڭ كۆلەملىك پارنىكتا كۆكتات تېرىلغۇ بازىسى، بۇ يەردىكى ھەممە ئائىلە كۆكتات تېرىيدۇ، ھەممە ئائىلىدە پارنىك بار بولۇپ، ئەتراپتىكى ناھىيە، شەھەرلەرنىڭ پەسىلسىز كۆكتات بىلەن تەمىنلەش ئورنى بولۇپ قالدى. كەنت پارتىيە ياچېيكىسىنىڭ ئەزاسى مو شۆيۇڭ مۇنداق دېدى:«ھەر يىلى بازارنى كۆكتات بىلەن تەمىنلەشكە ۋە تېرىقچىلىق ئائىلىلىرىنىڭ پايدا ئېلىشىغا كاپالەتلىك قىلىش ئۈچۈن، كەنت ئاھالىلەر كومىتېتى قەرەلسىز ھالدا ئالاقىدار خادىملارنى كۆكتات پارنىكىغا بېرىپ، تېرىقچىلىق ئائىلىلىرىنىڭ قىيىنچىلىقى، ئارزۇ-تەلىپىنى ئىگىلەشكە ئورۇنلاشتۇرۇپ، قەرەلسىز ھالدا تېرىقچىلىق ئائىلىلىرىنى تەجرىبە ئالماشتۇرۇشقا ياكى يېزا ئىگىلىك مۇتەخەسسىسلىرىنى تەكلىپ قىلىپ، تېرىقچىلىق ئائىلىلىرىنىڭ قىيىنچىلىقىنى ھەل قىلىپ، ئىلمىي تېرىقچىلىق بىلىملىرى ۋە تېخنىكىسىنى ئومۇملاشتۇرۇپ، تېرىقچىلىق ئائىلىلىرىنىڭ كىرىمىنى ئاشۇرۇشىغا ياردەم بەردى.»